القاهرة - ياسر ابراهيم - الأربعاء 21 أغسطس 2024 08:37 مساءً - كشفت الفنانة نجوى فؤاد، تفاصيل حالتها الصحية بعدما تعرضت لوعكة ذهبت على إثرها لإحدى المستشفيات لإجراء بعض الفحوصات الطبية، كما كشفت عن اختيارها للفنانة نيللي كريم، لتجسيد سيرتها الذاتية في عمل فني.
أبرز تصريحات نجوى فؤاد مع يارا أحمد:
وخلال مداخلة هاتفية بـ برنامج نجمك مع يارا، تقديم الإعلامية يارا أحمد، المذاع عبر شاشة قناة هي، أوضحت نجوى فؤاد ، أنها «أصيبت بوعكة عادية وكل إنسان معرض للإصابة بمثل هذه الوعكة، وأنا عملت أشعة على رجلي لأن عندي تعب في ركبي والقطنية، ولجأت للنقابة من شهرين أو تلاتة، علشان يساعدوني في الكشف والعلاج، والنقابة معندهاش استعداد غير لعلاج بسيط وتحاليل.. ومعاش النقابة 600 جنيه بس، وأشرف زكي مالوش ذنب هو موظف في الأول والآخر، وأنا مكنش عندي رد غير أني أقوله أشوفك بخير وبشكره أنه اهتم بيا واتصل بيّ.
وتابعت: «جمهوري مبيشوفنيش على الساحة خالص لأني مش قادرة أقف وألبس واتمكيج وأظهر بلياقتي العادية، مش قادرة الحقيقة».
وأردفت: «أشرف زكي عرض عليّ أني أخد من فلوسه الخاصة لو محتاجة، قولتله لأ مستورة لغاية دلوقتي، معنديش مصدر دخل خالص، ودي حاجات بتبقى خاصة مقدرش أتكلم فيها والحمد لله مستورة».
واستكملت: «الفن غدار، وكل مهنة غدارة، والفن بيحب الفنان يكون بيبرق على طول وحالته سليمة على طول، وساعات بيكون في مطبات بيقع فيها الإنسان بتكون بإيد ربنا، أنا معتزلة الرقص بقالي 17 سنة، ولكن مش هعتزل التمثيل».
وواصلت: «بيجيلي أدوار ولكني مش قادرة أقدم عمل جيد وأكون واعية من غير مسكنات وحقن، مش عايزة أتعب المنتج اللي بياخدني أجي أقوله في النص أنا تعبانة مش قادرة أكمل، والفن ولا أي شغلانة مفيش فيها كلمة أنا تعبان، ربنا قسم لي الرقص ونجحت فيه، وربنا أراد أنه ينجحني في الرقص وشُفت فيه كل الأيام الحلوة، وحب الجمهور أكبر ثروة بالدنيا».
واختتمت نجوى فؤاد: «ندمت شوية على قرار عدم الإنجاب، لأن في الظروف اللي إحنا فيها دي مين كان هيربي كويس معايا، أنا مكنتش متفرغة، وكل حاجة ربنا مقسمها وكله بيتنفذ من عند ربنا، بحب فيفي عبده ودينا على المستوى الشخصي بعيدًا عن هما بيشتغلوا إيه».
اقرأ أيضاً
«اتجوزت 5 مرات».. أبرز تصريحات نجوى فؤاد لـ قناة «LBCI» اللبنانية (فيديو)نجوى فؤاد عن زواجها من أحمد رمزي: كأنه عشوة ولم يدم طويلا
بين عذاب المرض والتشريد في عمر الـ70.. نجوى فؤاد تروي مأساتها بالدموع (فيديو)